የከፍተኛ ትምህርት መግቢያ ፈተና ተቋረጠ

የከፍተኛ ትምህርት መግቢያ ፈተና ተቋረጠ

 
የከፍተኛ ትምህርት መግቢያ ፈተና ተቋረጠ
 

 ባሕር ዳር፡ግንቦት 22/2008 ዓ/ም(አብመድ) የከፍተኛ ትምህርት መግቢያ ፈተና መቋረጡን የትምህርት ሚኒስቴር ገለጸ።

ከዛሬ ጀምሮ እስከ ሃሙስ ሊሰጥ የነበረው የ12ኛ ክፍል ፈተና እስካሁን ኮድ 12 የእንግሊዝኛ ፈተና መውጣቱ በመረጋገጡ ነው እንዲቋረጥ የተደረገው ብሏል።

ትምህርት ሚኒስቴር መረጃውን እንደማንኛውም ሰው ከኢንተርኔት ላይ ማግኘቱን የገለፁት የትምህርት ሚኒስትሩ አቶ ሽፈራው ሽጉጤ፥ የወጣውን ፈተና ትክክለኛነት ለማረጋገጥ ዛሬ ማለዳ ላይ ፈተናው እስከሚከፈት እና ከብርሃንና ሰላም ማተሚያ ቤት ካለው ፈተና ጋር አመሳክሮ ማረጋገጥ በማስፈለጉ ነው ብለዋል።

ሌሎች ፈተናዎችም ላለመውጣታቸው ምንም ዓይነት ማረጋገጫ ባለመኖሩ ሁሉም ፈተናዎች መቋረጣቸውን አመልክተዋል።

 

በመላው ሃገሪቱ 800 የፈተና ጣቢያዎች መኖራቸውን በማንሳት በቀጣይ በየትኛው ጣቢያ ላይ ይህ ፈተና እንደወጣ የምርመራ ስራ እንደሚከናወን ገልፀዋል።

ፈተና ሲዘጋጅ የመጀመሪያ እና መጠባቢያ እቅዶች ማለትም "plan A" እና " Plan B "እንዳለ ያነሱት ሚኒሰትሩ፥ የመጀመሪያው በመቋረጡም ሚኒስቴሩ የመጠባበቂያ እቅዱን ማለትም " Plan B " እንደሚተገብር አስታውቀዋል።

በአጭር ጊዜ ውስጥ የሎጅስቲክ አቅርቦት እንደተሟላ ፈተናው እንደሚሰጥም ነው ሚኒስቴሩ ያመለከተው። 

መላው ተፈታኞች እና ቤተሰቦቻቸው ይቅርታ የጠየቀው ሚኒስቴሩ ተማሪዎች ወደ ጥናታቸው እንዲመለሱም አሳስቧል።

 ከዚህ ቀደም የ10ኛ ክፍል ፈተና ወጥቷል የሚለው ግን ፍፁም ሀሰት መሆኑን ሚኒስትሩ አቶ ሽፈራው አረጋግጠዋል።

ምንጭ፡ኤፍቢሲ

 

Image: 

Visitors

  • Total Visitors: 2642813
  • Unique Visitors: 153639
  • Published Nodes: 2373
  • Since: 03/23/2016 - 08:03